Matthew 9

Iesu i uio Kaperenauma eai; tau palisi i hemauri

Mk. 2.3-13; Lk. 5.18-26

1Ia waga eai ie geru ie lau hari sana awasi eai, abo ie lage ena eanua eai. 2Na, tau esau ena asiebo i palisi, ie ota hatahata eai, se baheiama: Iesu edi nuatu adidirina i itayao, asiebo palisi tauabina wa i heriba, i ene, “Natugu e, u kode mo; em baaea se ribagigiridio.” 3Tauuriuri headi se heunaboisaha, si ene, “Tau ta Eaubada i arina baaeai.” 4Iesu, edi nuatu i nuatulobaiyao, i ene, “Saha baaeana au heunaboisahaei? 5Aitea i masamasaraha ede, ea ene, ‘Em baaea se ribagigiridi,’ e ea ene, ‘U torohai, u lau?’ 6Omi bena au ita Tau Natuna tanoubu eai ta, ia gigiborina eai, baaea i ribagigiridi (asiebo palisi tau‐abina i heriba, i ene), U torohai, em eba u nou, u lau em numa eai.” 7Ia i torohai, i lau ena numa eai. 8Moutuadi se ita se matausi Eaubada se hedebasaei, ena gigibori nei doha i mosei tatao aridi eai.

Mataio se eogai

Mk. 2.14; Lk. 5.27-29

9Nei eai Iesu i torohai i lau, tau esau ie ita, esana Mataio, takisi numana eai i babawa, ia i heriba, i ene, “U lauwataiguma.” Ia abo i torohai, ia i hemuriwatai.

Iesu Parisea edi riba i heuio

Mk. 2.15-20; Lk. 5.29-35

10Iesu i bawabigabiga, numa eai i aiai, eo takisitautano gamagamagari, eo tatao baabaaea se laoma Iesu maena heaheatayao maedi se bawagogo. 11Parisea abo se itadi, ena heaheatayao se heribadi si ene, “Tanuagamiu ie saha takisi tataodi, eo tatao baabaaea maedi se aiai esega?” 12Iesu riba wa i ataiei, i ene, “Taumaumauri doketa nige se abi, tauasiasiebo mo. 13Au lau teina riba ta aniona au eooi. ‘Eau nuatoatoa ea henua, aitalasm nige’e (Hos. 6.6):’ paana ede nige ea laoma taulaulau‐dudurai ea eogaidi, tatao baabaaeadi mo.”

14Ioane ena heaheatayao abo se laoma Iesu arinai, si ene, “Ai, eo Parisea, huia gamagamagari ai aiaiudi, oaem heaheatayao se saha nige se aiaiudi hinage?” 15Iesu i heribadi i ene, “Wa, tautawasora harihariu ena heriam se nuadubu tautawasora maedi sora se miaesega? Na huiana abo i lagema, tautawasora harihariu abo se laesuara, nei asubenadi eai abo se aiaiudi.”

Parabole: lulu eo iledi

Mk. 2.21, 22; Lk. 5.36-39

16Nige tau esau lulu harihariuna i popoi lulu beabeana arinai, bena se bodigudui abo se tapurisi uio, lulu wa abo i tapurisi ariri. 17Hinage tatao waina harihariuna nige se hegoi sarai opina iledi beabeadi alodi eai, ata doha iledi wa se tapurisi, waina abo i boriri, eo iledi abo se baaea; na waina harihariuna se hegoi sarai opina iledi harihariudi alodi eai, abo se lolo labulabui.”

Iesu, sine eo Iairo natuna siu i hemauridi

Mk. 5.22-43; Lk. 8.41-56

18Teina riba ta Iesu i heriheribadi, na sunago tanuagana esau i laoma ia i aihelahui, i ene. “Natugu siu ie mateo: na taba u laoma nimam u saosae ia potana eai, abo i mauri.” 19Iesu abo i torohai, ia i lauwatai, ena heaheata maenayao hinage. 20Na, sine esau ana asiebo borimai saudoudoilabui osina ie didi, ia murina eai i moninihima ana lulu dedeana i heasailaei. 21Ena nuatu i ene, “Ena ana lulu mo ea heasai, taugu abo se lolo.” 22Iesu abo i torobui sine wa i ita, i ene, “Natugu e, nuam i biga, oa sunusunumam eai taum se lolo’o”. 23Iesu abo i awasae sunago tanuagana ena numa eai tatao huelele se oioini i itadi, eo tatao se doudou. 24I heribadi i ene, “Au pesagorigori; siu me nige i mate, ie eno mo.” Isi ia se marumaruhiei, eo se talatalawasiei. 25Tatao wa se pesagorigori abo i lulau biri eai, siu nimana eai i abilau, ia abo i toro. 26Teina wasa ta ie lau nei oea ne i tauhetaiiri.

Taumatagibugibu labui matadi se helaladi.

27Iesu nei dimo ne abo i laugabaei, taumatagibugibu labui ia se lauwatai, se eogayoga, si ene, “Davida natuna e, u nuatoatoaimai.” 28Ia abo i awasae numa eai, taumatagibugibudi se laoma ia arinai: Iesu i heribadi, i ene, “Emi nuatu i adidiri au ene ina ta abina ea ata?” Se heriba si ene, “Guiau e, hedeona.” 29Isi matadi i abiitadi, i ene, “Emi sunuma doha meta arinai abo i tubu arimiu eai.” 30Matadi abo se lala; arinai abo Iesu awadi i tawaidi, i ene, “Wasa ta tabu tau esau i ataiei,” 31Isi abo se lau ia wasana se duai oea se hetaiiri.

32Ma laudi, dobila eai tau unaunana, demoni ia se lui, se woeayama Iesu arinai. 33Demoni wa se aiduieyao, abo tauunaunana wa ie riba: moutuadi lailai se nooei, si ene, “Nabada wa, Isaraela eai laulau ina doha nige ta itaitai.” 34Parisea tataodi mo si ene, “Demoni edi wasawasa ena gigibori eai, arinai demoni i aiduiedi.”

Iesu Galilaia eai i lauguguia

Mk. 6.5, 6

35Iesu edi eanua lailaidi, eo edi eanua gagiridi hinage gamagaridi i tautausidi, edi sunago alodi eai i lauheataedi, basileia wasa lolona i lauguguiaedi, asiebo eo iwala gamagamagari i hemauridi. 36Moutuadi lailai i itadi i nuatoatoaedi paana ede se nuadubu, eo se tatagorigori, doha mamoe nige taumiataunidi. 37Ena heaheatayao abo i heribadi, i ene, “Aiai sunasuna se gamagari ariri: na tauabidi eseesegadi mo. 38Guiau, aiai wa tanuagana, arinai au uura bena taupaisoa headi i hetamaridi ana aiai sunasuna abo se abidi.”